தமிழகம் முழுவதும் பள்ளிக்கல்வித்துறை சார்பில் அனைத்து பள்ளிகளுக்கும் சுற்றறிக்கை அனுப்பப்பட்டுள்ளது. அந்த சுற்றறிக்கையில் பள்ளிகளில் நடைபெறும் ஆண்டு விழாவின்போது சாதி ரீதியிலான பாடல்களை பயன்படுத்தக் கூடாது என்று தெரிவிக்கப்பட்டுள்ளது. முன்னதாக ஒரு பள்ளியில் நடைபெற்ற பாடலுக்கு மாணவர் ஒருவர் பாமக கட்சியின் துண்டுடன் நடனம் ஆடியது சர்ச்சையை ஏற்படுத்திய நிலையில் அந்த பள்ளியின் தலைமை ஆசிரியர் பணியிடமாற்றம் செய்யப்பட்டார். இந்நிலையில் கிருஷ்ணகிரி மாவட்டம் பர்கூர் பகுதியில் அரசு உயர்நிலைப் பள்ளியில் ஆண்டு விழா நடைபெற்றது. அப்போது ஐந்து மாணவர்கள் திரைப்பட பாடலுக்கு நடனமாடியுள்ளனர். அதன் பிறகு ஒரு மாணவர் வீரப்பன் படம் பொறிக்கப்பட்ட டி-ஷர்டை கையில் வைத்து நடனமாடியுள்ளான். அதோடு இரண்டு மாணவர்கள் கட்சி துண்டை போட்டு நடனமாடியுள்ளனர். இந்நிலையில் அரசு பள்ளிகளில் இதுபோன்ற திரைப்பட பாடல்கள் மற்றும் ஜாதி ரீதியிலான அடையாளங்களை காண்பிப்பது மிகவும் தவறு. இதனை கட்டாயமாக தவிர்க்க வேண்டும் என்று பள்ளிக்கல்வித்துறைக்கு புகார் சென்றுள்ளது. எனவே இதுபோன்று செயல்களை தவிர்க்க வேண்டும் என்று பள்ளிக்கல்வித்துறை சுற்றறிக்கையில் தெரிவித்துள்ளது. மேலும் இதுபோன்ற சம்பவங்கள் நடைபெறுவது தெரிய வந்தால் தலைமை ஆசிரியர் உட்பட பள்ளியின் ஆசிரியர்கள் மீது கடுமையான நடவடிக்கை எடுக்கப்படும் என்று எச்சரிக்கப்பட்டுள்ளது.