தமிழக முதல்வர்  ஸ்டாலின் நேற்று நடிகர் விஜயை மறைமுகமாக விமர்சித்து இருந்தார். அதாவது இன்று புதிது புதிதாக கட்சி தொடங்குபவர்கள் எல்லாம் திமுக அழிய வேண்டும் என்று நினைக்கிறார்கள். அவர்களுக்கு எல்லாம் பதில் சொல்லி நேரத்தை வீணடிக்க விரும்பவில்லை என்று கூறி இருந்த நிலையில் தற்போது இதற்கு தமிழக வெற்றி கழகத்தின் செய்தி தொடர்பாளர் வீர விக்னேஸ்வரன் பதிலடி கொடுத்துள்ளார். இதுகுறித்து அவர் கூறியதாவது, முதல்வர் ஸ்டாலின் எங்கள் தலைவர் விஜயை தரக்குறைவான வார்த்தைகளால் விமர்சித்துள்ளார்.

இது துரதிஷ்டவசமானது மற்றும் அரசியல் எதிரிகளுக்கு இதுபோன்று பதிலளிப்பது சரியான போக்கு கிடையாது. தமிழ்நாட்டில் தங்களுடைய குடும்ப ஆட்சியை காப்பாற்றிக் கொள்வதற்காக எதிரிகளை தரக்குறைவான வார்த்தைகளால் விமர்சிப்பது திமுகவின் டிஎன்ஏவில் இருக்கிறது. இதைத்தான் முதல்வரின் பேச்சும் காட்டுகிறது. கடந்த 1970 ஆம் ஆண்டு குடும்ப ஆட்சிக்கு எதிராகத்தான் எம்ஜிஆர் கலகம் செய்தார். இந்த குடும்ப ஆட்சியை அகற்றியும் காட்டினார். இதே வரலாறு வருகின்ற 2026 ஆம் ஆண்டு தேர்தலில் திரும்பும். மேலும் வருகிற 2026 ஆம் ஆண்டு நடைபெறும் தேர்தலில் குடும்ப ஆட்சியை தகர்த்தெறிந்து விட்டு விஜய் ஜனநாயக ஆட்சியை அமைப்பார் என்று கூறினார்.