ஜம்மு-காஷ்மீரின் அனந்த்நாக் மாவட்டத்தில் உள்ள பைசரன் பள்ளத்தாக்கில் ஏப்ரல் 22ஆம் தேதி நடந்த பயங்கரவாத தாக்குதலால் 26 பேர், பெரும்பாலும் சுற்றுலாப் பயணிகள் உயிரிழந்த சம்பவம் நாடு முழுவதும் பெரும் சோகத்தை ஏற்படுத்தியது. இந்தத் தாக்குதலுக்கு நடிகர் அஜித் ஆழ்ந்த வருத்தத்தையும், தாக்குதலில் உயிரிழந்தோர் குடும்பங்களுக்கு தனது இரங்கலையும் தெரிவித்துள்ளார். “என் மனது அந்த குடும்பங்களுக்காக மிகவும் உடைந்துள்ளது. இத்தகைய சம்பவங்கள் மீண்டும் நடக்க வேண்டாம் என்பதற்காக நான் பிரார்த்திக்கிறேன்,” என அஜித் தெரிவித்தார்.

அஜித் மேலும் கூறியதாவது, “நாம் அனைவரும் ஒருவருக்கொருவர் உணர்வுப் பூர்வமாக புரிந்து கொள்ளவும், தங்களைப் பொருத்துக் கொண்டு வாழும் மனப்பான்மையை வளர்த்துக் கொள்ளவும் வேண்டும். நமது எல்லைகளை பாதுகாக்கும் இராணுவ வீரர்களின் தியாகங்களை நாம் மரியாதைப்படுத்த வேண்டும். அவர்கள் தங்களது உயிரை பணயமாக வைத்து நம்மை பாதுகாக்கின்றனர். அவர்களுக்காக நமது நாட்டில் நாம் ஒற்றுமையுடன் இருக்க வேண்டும். மத, ஜாதி என எந்த வகையிலும் நம்மிடையே சண்டை ஏற்படாமல், ஒன்றுபட்டு அமைதியாக வாழ வேண்டும்” என்று தெரிவித்துள்ளார்.

இந்த தாக்குதலுக்குப் பிறகு மத்திய அரசு கடும் நடவடிக்கைகளை மேற்கொண்டுள்ளது. பாகிஸ்தான் ஆதரவு பயங்கரவாதத்திற்கு எதிராக, 1960ஆம் ஆண்டு கையெழுத்தான சிந்து நதி ஒப்பந்தத்தை இடைநிறுத்தும் முடிவை அரசு அறிவித்துள்ளது. மேலும், அட்டாரி ஒருங்கிணைந்த சோதனைச் சாவடிக்குப் பூட்டு வைக்கப்பட்டுள்ளது. பாகிஸ்தான் குடிமக்களுக்கு வழங்கப்பட்ட அனைத்து வகை விசாக்களும் ரத்து செய்யப்பட்டுள்ளன. பயங்கரவாதிகளும், சதி திட்டத்தில் ஈடுபட்டவர்களும் கடுமையாக தண்டிக்கப்படுவார்கள் என மத்திய அரசு உறுதியளித்துள்ளது.