தமிழக சட்டமன்றத்தில் சமூக நலன் மற்றும் மகளிர் உரிமைத் துறை மானிய கோரிக்கையின்போது, அமைச்சர் கீதா ஜீவன் பல முக்கிய அறிவிப்புகளை வெளியிட்டார். மாற்றுத் திறனாளிகளுக்கான ரூ.1000 உதவித் தொகை பெற்றாலும், அதே குடும்பத்தில் உள்ள பெண்களுக்கும் ரூ.1000 மகளிர் உரிமைத் தொகை வழங்கப்படும் என அறிவித்தார்.
இந்த அறிவிப்பு, அந்த குடும்பங்களுக்கு இரட்டிப்பு நன்மையாக அமையும் வகையில், மகிழ்ச்சியை ஏற்படுத்தியுள்ளது.
அமைச்சர் அறிவித்த 22 புதிய திட்டங்களில், திருநங்கைகளுக்காக “அரண்” என்ற பெயரில் சென்னை மற்றும் மதுரையில் தங்கும் இல்லங்கள் உருவாக்கப்படும். இதற்காக ரூ.64 லட்சம் ஒதுக்கப்பட்டுள்ளது.
அதற்குமேல், வறுமைக் கோட்டிற்கு கீழ் உள்ள மகளிருக்கு வாழ்க்கைத் தரம் மேம்பட, ஈரமாவு கிரைண்டர் வாங்குவதற்காக ரூ.5000 வரை மானியம் வழங்கப்படும். மொத்தம் 2000 பெண்களுக்கு 1 கோடி ரூபாய் மதிப்பிலான மானியம் ஒதுக்கப்பட்டுள்ளது.
பெண்கள் சுயதொழில் தொடங்க ரூ.50,000 மானியம், மகப்பேறு நிதி உதவித் தொகை ரூ.18,000, சமையல் எண்ணெய் உற்பத்தி செய்யும் பெண்களுக்கு ரூ.3 லட்சம் வரை கடன் மற்றும் அதில் 50% வரை மானிய உதவி வழங்கப்படும்.
தமிழக அரசு, இந்த திட்டங்கள் மூலம் மகளிர் முன்னேற்றத்தை நோக்கி பல வழிகளில் ஊக்குவித்து வருகிறது. இந்த அறிவிப்புகள் பெண்களின் வாழ்வாதார மேம்பாட்டுக்கு புதிய பாதையை ஏற்படுத்தும் என எதிர்பார்க்கப்படுகிறது.
