தமிழக முதல்வர் மு.க ஸ்டாலின் நாளை தூத்துக்குடிக்கு ஆய்வு மேற்கொள்கிறார்..

மத்தியக் குழுவினர் தூத்துக்குடியில் இன்று ஆய்வு – மாண்புமிகு முதலமைச்சர் அவர்கள் நாளை தூத்துக்குடிக்கு ஆய்வு மேற்கொள்கிறார் – தமிழ்நாடு அரசு அறிவிப்பு.

தமிழக அரசின் செய்திக்குறிப்பில், தூத்துக்குடி, திருநெல்வேலி, தென்காசி மற்றும் கன்னியாகுமரி ஆகிய 4 மாவட்டங்களில் டிசம்பர் 17 மற்றும் 18 ஆகிய தேதிகளில் பெய்த கனமழையின் காரணமாக கடுமையாக பாதிக்கப்பட்டுள்ளது. இதனை எதிர்கொள்ளவும், மக்களுக்கு தேவையான மீட்பு மற்றும் நிவாரண நடவடிக்கைகளையும் மேற்கொள்ள அமைச்சர் பெருமக்கள் மற்றும் இந்திய ஆட்சிப்பணி அலுவலர்களும் உடனடியாக பாதிக்கப்பட்ட மாவட்டங்களுக்கு அனுப்பி வைக்க மாண்புமிகு முதலமைச்சர் அவர்கள் உத்தரவிட்டிருந்தார்.

மேலும், அப்பகுதிகளில் மாநில பேரிடர் மீட்பு குழு, தேசிய பேரிடர் மீட்பு குழு, தீயணைப்புத் துறை, காவல் துறையினர் மற்றும் அனைத்து அரசு துறைகளுடன் இணைந்து ஒருங்கிணைந்த முறையில் மீட்பு மற்றும் நிவாரண பணிகள் மேற்கொள்ளப்பட்டு, பாதிக்கப்பட்ட மக்கள் மீட்கப்பட்டு பாதுகாப்பான இடங்களில் தங்க வைக்கப்பட்டு வருகிறார்கள். தூத்துக்குடி மாவட்டத்தில் மீட்பு பணிகள் தொடர்ந்து நடைபெற்று வருகின்றன.

இந்த சூழ்நிலையில் முன்னதாக நாளை (இன்று) தூத்துக்குடிக்கு செல்வதாக அறிவித்திருந்த மாண்புமிகு முதலமைச்சர் அவர்கள் மத்திய குழு இன்று தூத்துக்குடி மாவட்டத்தில் ஆய்வு மேற்கொள்ள உள்ளதால் மாவட்ட நிர்வாகம் அவர்களுக்கு உடனிருக்க வேண்டிய நிலையைக் கருத்தில் கொண்டு இன்று இரவு மதுரை சென்று அடுத்த நாள் (21. 12. 2023) தூத்துக்குடியில் ஆய்வு மேற்கொள்கிறார்” என தெரிவிக்கப்பட்டுள்ளது.