நெல்லை மாவட்டத்தைச் சேர்ந்த புகழ்பெற்ற இருட்டுக்கடை அல்வா கடையின் உரிமையாளரான கவிதா சிங்கின் மகள் ஸ்ரீ கனிஷ்கா சிங், தனது கணவர் குடும்பத்தினர் தன்னிடம் கூடுதல் வரதட்சணை கேட்டு கொடுமைபடுத்தியதாக குற்றம்சாட்டி திருநெல்வேலி காவல்நிலையத்தில் புகார் அளித்துள்ளார்.

40 நாட்களுக்கு முன்பு கனிஷ்காவுக்கும் கோவையைச் சேர்ந்த பல்ராம் சிங் என்பவருக்கும் பிரமாண்டமான திருமணம் நடைபெற்றது.

திருமணத்துக்குப் பிறகு வெறும் சில நாட்களிலேயே கனிஷ்காவை கணவர் மற்றும் அவரது குடும்பத்தினர் கூடுதல் சொத்துகள், வரதட்சணை, மற்றும் பிரபலமான இருட்டுக்கடை உரிமையை அவர்களிடம் மாற்றித் தரவேண்டும் என மிரட்டியுள்ளனர்.

மேலும், ஒரு நாள் கனிஷ்காவை அவரது கணவர் மற்றும் மாமனார் காரில் அழைத்துச் சென்று, தாயின் வீட்டில் இறக்கிவிட்டு, சொத்து தொடர்பான ஆவணங்களை எழுதிக் கொண்டு வரும்படி கூறியுள்ளதாக புகாரில் தெரிவித்துள்ளார்.

இதனையடுத்து, ஸ்ரீ கனிஷ்கா சிங் நேரடியாக திருநெல்வேலி காவல்நிலையத்தில் புகார் அளித்ததோடு, தமிழக முதல்வரின் தனிப்பிரிவுக்கும் புகார் அனுப்பியுள்ளார்.  இந்த நிலையில் இருட்டுக்கடை அல்வா உரிமையாளரின் மருமகன் பல்ராம் சிங்குக்கு பாளையங்கோட்டை போலீசார் சம்மன் அனுப்பியுள்ளனர்.