பாலிவுட் நடிகை வித்யா பாலன், தனது பெயரில் போலியாக உருவாக்கப்பட்ட ஏஐ (AI) டீப்ஃபேக் வீடியோக்கள் சமூக வலைதளங்களில் பரவிவருவதாகத் தெரிவித்து, பொதுமக்களை கவனமாக இருக்குமாறு கேட்டுக்கொண்டுள்ளார். சமூக வலைதளங்களில் பதிவிட்டுள்ள அவர், வாட்ஸ்அப் உள்ளிட்ட பல்வேறு தளங்களில் தன்னை போன்ற தோற்றத்தில் உருவாக்கப்பட்ட போலி வீடியோக்கள் பரவி வருகின்றன என்று கூறியுள்ளார். “இந்த வீடியோக்கள் என்னுடையது அல்ல. தயவுசெய்து எந்த தகவலையும் பகிரும் முன் சரிபார்க்கவும்,” என்று அவர் தெரிவித்துள்ளார்.
இந்த வீடியோவை பகிர்ந்து ‘Scam Alert’ (ஏமாற்ற எச்சரிக்கை) என குறிப்பிட்டு, இது போலியானது என்று அவர் வலியுறுத்தினார். அந்த வீடியோவில், “ஹே! நான் உங்கள் பிடித்த நடிகை வித்யா பாலன்…” என்று பேசுவதாக காணப்பட்டது. இதற்கு முன்பாக, நடிகைகள் ரஷ்மிகா மந்தன்னா, தீபிகா படுகோன் உள்ளிட்ட பலர் இதே போல் ஏஐ மோசடிகளின் பாதிப்புக்குள்ளாகியுள்ளனர். மேலும், அலியா பட்ட், கத்ரீனா கைப், ரன்வீர் சிங், அமீர் கான் மற்றும் கிரிக்கெட் வீரர் சச்சின் தெண்டுல்கர் போன்ற பிரபலங்களும் இவ்வாறான போலி வீடியோக்களின் மூலமாக பாதிப்புக்குள்ளாகியுள்ளனர்.
