விருதுநகர் மாவட்டம் திருவண்ணாமலை பகுதியில் மான்களை வேட்டையாடுவதாக வனத்துறையினருக்கு ரகசிய தகவல் கிடைத்தது. அந்த தகவலின் படி ஸ்ரீவில்லிபுத்தூர் வனத்துறை அதிகாரிகள் சம்பந்தப்பட்ட பகுதிக்கு சென்று கண்காணிப்பில் ஈடுபட்டனர். அப்போது ஒரு விவசாய தோட்டத்தில் வேட்டை நாயுடன் மான் வேட்டைக்காக 2 நபர்கள் காத்திருந்தது தெரிய வந்த நிலையில் அவர்களை கைது செய்தனர்.

அவர்களிடமிருந்து வேட்டையாடப்பட்ட புள்ளி மானின் தலை மற்றும் மாமிசம் போன்றவைகளை அதிகாரிகள் பறிமுதல் செய்தனர். பின்னர் அவர்களிடம் நடத்திய விசாரணையில் தங்கராஜ்(30) மற்றும் முத்துகிருஷ்ணன்(38) என்பது தெரியவந்தது. இதைத் தொடர்ந்து அவர்களுக்கு உதவியாக இருந்த சந்திரகுமார்(26) மற்றும் நாகராஜ்(34) ஆகியோரையும் வனத்துறையினர் கைது செய்தனர். இவர்கள் 4 பேரையும் கைது செய்த வனத்துறையினர் சிறையில் அடைத்தனர். மேலும் இது போன்ற பாதுகாக்கப்பட்ட விலங்குகளை வேட்டையாடினால் கடும் நடவடிக்கை எடுக்கப்படும் என்று வனத்துறை அதிகாரிகள் எச்சரித்துள்ளனர்.