நேபாளத்தில் கடந்த சில நாட்களாக கடுமையான கனமழை காரணமாக, பல பகுதிகளில் வெள்ளப்பெருக்கும் நிலச்சரிவுகளும் ஏற்பட்டுள்ளன. இந்த வெள்ளம் மற்றும் நிலச்சரிவில் சிக்கி பலியானோர் எண்ணிக்கை 170-ஐ தாண்டியுள்ளது. நேபாளத்தின் கிழக்கு மற்றும் மத்திய பகுதிகள் பெரும் வெள்ளத்தில் மூழ்கி, மக்களின் இயல்பு வாழ்க்கை பாதிக்கப்பட்டுள்ளது. பல மாவட்டங்களில் 20 முதல் 30 செ.மீ மழை கொட்டி தீர்த்ததால், நகரங்கள் முழுமையாக வெள்ளத்தில் மூழ்கி போயுள்ளன. இதனால், தேசிய நெடுஞ்சாலைகள் துண்டிக்கப்பட்டு, போக்குவரத்து பாதிக்கப்பட்டுள்ளது.

கனமழை காரணமாக, தலைநகர் காத்மண்டுவில் 48 பேர் வெள்ளத்தில் சிக்கி உயிரிழந்துள்ளனர். காத்மண்டுவின் எல்லையான தாடிங் மாவட்டத்தில் ஒரு பேருந்து நிலச்சரிவில் புதைந்ததில் 19 பேர் உயிரிழந்துள்ளனர். மேலும், பக்தபூர் நகரில் வீடு இடிந்து விழுந்ததில் 5 பேர் உயிரிழந்துள்ளனர். மக்வான்பூரில், கால்பந்து பயிற்சி மைதானத்தில் பயிற்சி செய்து கொண்டிருந்த 6 பேர் நிலச்சரிவில் சிக்கி உயிரிழந்தனர். இதற்காக 20,000க்கும் மேற்பட்ட மீட்பு பணியாளர்கள் வெள்ளத்தில் சிக்கிய மக்களை மீட்கும் பணியில் ஈடுபட்டுள்ளனர்.

கனமழை மற்றும் நிலச்சரிவால் 322 வீடுகளும் 16 பாலங்களும் சேதமடைந்துள்ளன. இதுவரை 3,626 பேர் பாதுகாப்பாக மீட்கப்பட்டு பாதுகாப்பான இடங்களில் தங்க வைக்கப்பட்டுள்ளனர். நேபாளத்தில் இதுவரை இல்லாத அளவிற்கு கனமழை பதிவாகி இருப்பதாக அந்நாட்டு மக்கள் கூறுகின்றனர். நேபாள வானிலை ஆய்வு மையம், கனமழை தொடர்ந்து நீடிக்கும் என்றும் அதற்கான எச்சரிக்கையை விடுத்துள்ளது.