பெங்களூரில் பிரசாந்த் ஹரிதாஸ் என்ற வாலிபர் வசித்து வருகிறார். இவர் LinkedIn ஆப்பில் கடந்த 3 ஆண்டுகளாக வேலை தேடி கொண்டே இருந்தார். இந்நிலையில் தொடர்ந்து வேலையில்லாமல் திண்டாடி பலமுறை நிர்வாகிகளிடமும், நிறுவனங்களிடமும் தொடர்ச்சியாக நிராகரிப்பு மற்றும் சரியான பதில் கிடைக்காமல் பல இன்னல்களை சந்தித்துள்ளார்.

அதனால் மன உளைச்சலுக்கு ஆளான இவர் தனது ஏமாற்றத்தை வெளிப்படுத்தும் விதமாக வேலைவாய்ப்பு தேடி வந்த LinkedIn செயலியில் தனது மரண அறிவிப்பு போன்ற ஒரு பதிவை வெளியிட்டுள்ளார்.

அந்த பதிவில் அவரது புகைப்படத்தில் மீது “Rest In Peace “என்று எழுதி தன்னை வேலைக்கு ஏற்க மறுத்த தொழில் உலகையும் தான் வேலைக்காக செய்த முயற்சிகளையும் அவர் விவரித்துக் கூறியிருந்தார். அதோடு இந்த செயல் தன்னுடைய வாழ்க்கையை முடிக்க நினைத்து செய்தது அல்ல என்றும், வேலையை தேடி தேடி மனம் உடைந்த நிலையில் தன்னுடைய சோகத்தை வெளிப்படுத்துவது மட்டுமே என்று கூறினார். “நான் தற்கொலை செய்யப் போவதில்லை ஆனால் 3 ஆண்டுகளாக வேலையில்லாமல் தவித்து வந்ததாகவும், இந்த உலகத்தில் வாழ தனக்கு இன்னும் அத்தியாவசியங்கள் இருக்கின்றன” என்றும் அவர் உருக்கமாக பதிவிட்டிருந்தார்.

இந்த பதிவு இணையத்தில் வைரலான நிலையில் அவருக்கு ஆதரவு தெரிவித்து வேலை வாய்ப்புகள் மற்றும் நெட்வொர்க் லிங்குகளை நெட்டிசன்கள் பகிர்ந்து வருகின்றனர். மேலும் இந்த வாலிபரின் செயல் இன்றைய வேலை சந்தையின் கடுமையான உண்மைகளை வெளிப்படுத்துவதாக இருக்கிறது என பலரும் கருத்து தெரிவித்து வருகிறார்கள்.