தஞ்சை மாவட்டம் பட்டுக்கோட்டையை அடுத்துள்ள வெட்டுவாக்கோட்டை கிராமத்தில் ராஜேந்திரன், கலா தம்பதியினர் வசித்து வந்தனர். இவர்களது மூன்றாவது மகள் காவியா(17). இவர் ஊரணிபுரம் அரசு மேல்நிலைப்பள்ளியில் 12ம் வகுப்பு படித்து வருகிறார். தற்போது தமிழக முழுவதும் 12-ம் வகுப்பு அரசு பொது தேர்வு நடைபெற்று வரும் நிலையில், காவியாவின் அம்மா கலா நேற்று திடீரென மாரடைப்பால் உயிரிழந்தார். இந்நிலையில் மாணவி காவியாவிற்கு நேற்று உயிரியல் தேர்வு என்பதால், படிப்பில் மிகுந்த ஆர்வம் கொண்ட அவர் தனது தாய் வீட்டில் இறந்து கிடக்கும் நிலையில் தேர்வழுது பள்ளிக்கு சென்றார்.

அப்போது அவர் தனது அம்மாவின் காலில் கதறி அழுதபடியே விழுந்து ஆசீர்வாதம் பெற்றார். இதை பார்த்த அங்கிருந்தவர்கள் கதறி அழுதனர். இதைத்தொடர்ந்து அவர் பள்ளிக்கு சென்று தேர்வு எழுதினார். இது குறித்த அவர் கூறியதாவது, நான் ஒவ்வொரு முறையும் தேர்வு எழுத செல்லும் போது என் அம்மாவிடம் காலில் விழுந்து ஆசீர்வாதம் வாங்குவேன். அவர் எனக்கு திருநீர் பூசி விடுவார். அதோடு நன்றாக தேர்வு எழுத வேண்டும் என்று கூறுவார். தேர்வு எழுதி விட்டு வந்த பிறகு தேர்வு எப்படி எழுதினாய், படிப்பு முக்கியம், நன்றாக படிக்க வேண்டும் என்று கூறுவார். இன்று எனது அம்மா இறந்து விட்டார். எனக்கு படிப்பு முக்கியம் என்பதால் நான் இன்று தேர்வு எழுத வந்துள்ளேன் என்று அவர் கண்ணீர் மல்க தெரிவித்தார்.