தமிழக முதல்வர் ஸ்டாலின் பொங்கல் பண்டிகை முன்னிட்டு ஆவின் பணியாளர்கள் அனைவருக்கும் ஊக்கத்தொகை வழங்குவதற்கு உத்தரவிட்டுள்ளார். அந்த உத்தரவின் படி ஆவின் ஊழியர்களுக்கு ஊக்கத்தொகை வழங்கும் நிகழ்ச்சி நடைபெற்றது. இந்த நிகழ்ச்சியில் பால்வளத் துறை அமைச்சர் மு. நாசர் 30 பணியாளர்களுக்கு நேரடியாக ஊக்கத்தொகை வழங்கினார்.‌‌ இந்நிலையில் தமிழ்நாடு பால் கூட்டுறவு உற்பத்தியாளர்கள் சங்கத்தில் பணிபுரியும் 1325 பணியாளர்களுக்கு ரூ. 12.58 லட்சம் ஊக்கத்தொகை வழங்கப்பட்டது.

அதன் பிறகு மாவட்ட ஒன்றியங்களில் பணிபுரியும் 2,969 பணியாளர்களுக்கு ரூ. 28.47 லட்சமும், தொடக்க பால் உற்பத்தியாளர்கள் கூட்டுறவு சங்கங்களில் பணிபுரியும் 22,895 பணியாளர்களுக்கு ரூ. 228.95 லட்சமும் ஊக்கத்தொகை வழங்கப்பட்டது. அதன்படி மொத்தமாக‌ 27,189 பணியாளர்களுக்கு ரூ. 270 லட்சம் பொங்கல் ஊக்கத்தொகை பால்வளத்துறை அமைச்சரால் வழங்கப்பட்டது. மேலும் தமிழ்நாடு தொடக்க பால் உற்பத்தியாளர்கள் கூட்டுறவு சங்கங்களை சேர்ந்த அதாவது 603 கூட்டுறவு சங்கங்களை சேர்ந்த 98,877 பால் ஊற்றும் உறுப்பினர்களுக்கு கூட்டுறவு சங்கங்களின் லாபத்தில் இருந்து ரூ. 1,295.59 லட்சம் ஊக்கத்தொகை வழங்கப்பட்டுள்ளது.