ஈரோடு மாவட்டத்தில் நாராயணதாஸ், ஹேமப்பிரியா என்ற தம்பதியினர் வசித்து வந்தனர். இவர்களுக்கு 2 மகன்கள் உள்ளனர். நாராயணதாஸ் வீடு கட்டுவதற்காக கோபியில் உள்ள ஆப்டஸ் என்ற தனியார் நிதி நிறுவனத்தில் ரூ. 10 லட்சம் கடன் வாங்கியுள்ளார். இதில் 3 மாத தவணையை அவர் செலுத்தவில்லை.

இதனால் கடன் கொடுத்த நிறுவனம் சார்பில் 4 பேர் கொண்ட குழுவினர் 3 நாட்களாக நாராயணதாஸ் வீட்டுக்கு முன்பு நின்று கொண்டு கடனைத் தவணையை செலுத்தக் கூறி தகாத வார்த்தையால் பேசியுள்ளனர்.

வீட்டில் தனியாக இருந்த ஹேமப்பிரியா தனது கணவரும், மகன்களும் வெளியே சென்று விட்டனர். அவர்கள் வந்த பிறகு கடன் தொகையை கட்ட ஏற்பாடு செய்வதாக கூறியுள்ளார். ஆனால் அதை கேட்காமல் நிதி நிறுவனத்தினர் வீட்டின் சுவற்றில் இந்த வீட்டின் பெயரில் கடன் உள்ளது அதனால் ஏலம் விடப்படும் என்று எழுதினர்.

இதனால் ஹேமப்பிரியா மன உளைச்சலில் இருந்துள்ளார். இந்நிலையில் கடந்த 2-ம் தேதி மாலை 6 மணி அளவில் மீண்டும் நாராயணதாஸ் வீட்டிற்கு சென்ற நிதி நிறுவன ஊழியர்கள் ஹேமப்பிரியாவிடம் கடன் தொகையை உடனே செலுத்த வேண்டும் என்று வற்புறுத்தியுள்ளனர்.

இதன் காரணமாக மன வேதனை அடைந்த அவர் வீட்டிற்குள் சென்று மண்ணெண்ணெய் கேனை எடுத்து வந்து ஊழியர்கள் முன்னால் உடலில் மண்ணெண்ணெயை ஊற்றி தீ வைத்துக் கொண்டார். இதனால் உடல் கருகிய அவர் அலறி துடித்தார்.

இதை பார்த்த ஊழியர்கள் அங்கிருந்து ஓடி விட்டனர். சத்தம் கேட்டு வந்த அக்கம் பக்கத்தினர் ஹேமப்பிரியாவை மீட்டு மருத்துவமனைக்கு அழைத்துச் சென்றனர். ஆனால் டாக்டர் தீவிர சிகிச்சை அளித்தும் அவர் சிகிச்சை பலன் இன்றி நேற்று முன்தினம் உயிரிழந்தார்.

இதை தொடர்ந்து அவரது மரணத்திற்கு காரணமானவர்கள் மீது நடவடிக்கை எடுக்கும் வரை உடலை வாங்க மாட்டோம் என்று அவரது குடும்பத்தினர் போராட்டத்தில் ஈடுபட்டனர். அப்போது இது குறித்து உரிய விசாரணை நடத்தி சம்பந்தப்பட்டவர்கள் மீது நடவடிக்கை எடுக்கப்படும் என்று காவல்துறையினர் உறுதியளித்தனர்.

இதையடுத்து ஹேமப்பிரியாவின் உடலை உறவினர்கள் பெற்றுக் கொண்டனர். இதற்கிடையில் தனியார் நிறுவன ஊழியர்கள் மீது நாராயணதாஸ் புகார் அளித்துள்ளார். இது குறித்து காவல்துறையினர் வழக்கு பதிவு செய்து அந்நிறுவனத்தின் ஊழியர்கள் 4 பேரை வலைவீசி தேடி வருகின்றனர்.