ரஜினிகாந்த் நடிப்பில் உருவாகியுள்ள வேட்டையன் படத்தின் இசை வெளியீட்டு விழா செப்டம்பர் 20ஆம் தேதி சென்னை நேரு அரங்கில் நடைபெறவுள்ளது. ஜெய் பீம் புகழ் இயக்குநர் த.செ.ஞானவேல் இயக்கத்தில் உருவாகியுள்ள இந்த படத்தில் ரஜினியுடன் அமிதாப் பச்சன், மஞ்சு வாரியார், பஹத் பாசில், ராணா, ரித்திகா சிங் போன்றோர் நடித்துள்ளனர்.

ஏற்கனவே படத்தில் இருந்து வெளியான மனசிலாயோ பாடல் ரசிகர்கள் மத்தியில் நல்ல வரவேற்பை பெற்றுள்ளது. இந்நிலையில், படத்தின் முழு இசை வெளியீட்டு விழாவுக்காக ரசிகர்கள் ஆவலுடன் காத்திருக்கின்றனர். அனிருத் இசையமைத்துள்ள இந்த படத்தின் பாடல்கள் எல்லாம் வெற்றி பாடல்களாக அமையும் என ரசிகர்கள் நம்பிக்கை தெரிவித்துள்ளனர்.

ரஜினிகாந்த் நடிப்பில் வெளியாகும் ஒவ்வொரு படமும் ரசிகர்கள் மத்தியில் பெரும் எதிர்பார்ப்பை ஏற்படுத்தும். அந்த வகையில், வேட்டையன் படமும் ரசிகர்கள் மத்தியில் அதிக எதிர்பார்ப்பை ஏற்படுத்தியுள்ளது. இசை வெளியீட்டு விழாவுடன் படத்தின் பிரமோஷன் பணிகள் வேகமாக நடைபெற்று வருகிறது. அக்டோபர் 10ஆம் தேதி உலகெங்கிலும் திரைக்கு வரவுள்ள இந்த படம், ரசிகர்களின் எதிர்பார்ப்பை நிறைவேற்றும் என எதிர்பார்க்கப்படுகிறது.