மதுரையில் செய்தியாளர்களை சந்தித்த முன்னாள் மத்திய மந்திரியான பொன் ராதாகிருஷ்ணன் கூறியதாவது, தவெக கட்சியின் தலைவர் விஜய், ஒரே நாடு ஒரே தேர்தல் முறைக்கு எதிராக பேசியிருப்பது வியப்பாக உள்ளது. ஒவ்வொரு தேர்தலுக்கும் எவ்வளவு செலவாகிறது என்பது தெரியுமா? இதை குறைப்பது தான் தேசிய கடமை. இதற்காகவே நாடு முழுவதும் ஒரே நேரத்தில் தேர்தல் நடத்தப்படுகிறது. அரசியல் கட்சிகள் ஒரே தேர்தலின் போதும் தங்களது கருத்துக்களை செயல்படுத்த முடியும். தவெக கட்சி ஆட்சிக்கு வந்தால் ஆட்சியில் பங்களிப்பதாக அவர் கூறினார். இதை கட்சிகள் வரவேற்கலாம், ஆனால் மக்கள் உடனடியாக வரவேற்க மாட்டார்கள். கட்சி கூட்டணியில் இருந்தால், கூட்டணி கட்சிகளுக்கும் பங்கு கொடுக்க வேண்டும்.

ஆனால் அந்த மனநிலையில் திமுக தற்போது இல்லை. மற்ற கட்சிகளும் அந்த மனநிலையில் உள்ளதா என்பது பற்றி எனக்கு தெரியவில்லை. ஆனால் பாஜக இதை நடைமுறைப்படுத்தி வருகிறது. குடும்ப அரசியல் என்பது ஒரு கேவலமான நிலையாகும். ஒரு குடும்பத்தை விட்டு விட்டால் வேற கதியில்லை என்ற நிலைக்கு காங்கிரஸும், திமுகவும் தள்ளப்பட்டுள்ளது. மற்ற கட்சிகளும் கூட குடும்ப அரசியல் செய்கின்றனர். திமுகவின் குடும்ப அரசியல் குறித்து பேசும் எடப்பாடி பழனிச்சாமி காங்கிரஸ் கட்சியின் குடும்ப அரசியல் பற்றி குரல் கொடுப்பாரா? பாஜக ஒருபோதும் குடும்ப அரசியல் செய்யாது குடும்ப அரசியலுக்கு வரும் தேர்தல் முற்றுப்புள்ளி வைக்கும் என்று அவர் கூறினார்.