சந்திராயன் 1 மிஷன் இயக்குனர் ஸ்ரீநிவாஸ் ஹெக்டே (71) உடல்நல குறைவால் காலமானார். கடந்த 1978 முதல் 2014ஆம் ஆண்டு வரை இந்திய விண்வெளி ஆராய்ச்சி மையமான இஸ்ரோவில் பணியாற்றி வந்த இவர் நிலவின் ரகசியங்களை ஆராய அனுப்பப்பட்ட சந்திராயன் 1 மிஷனில் இயக்குனராக பதவி வகித்தவர்.

இந்த நிலையில் சிறுநீரக செயலிழப்பு காரணமாக கடந்த சில நாட்களாக அவதிப்பட்டு வந்த அவர் பெங்களூரு மருத்துவமனையில் சிகிச்சைக்காக அனுமதிக்கப்பட்டு இருந்தார். இந்த நிலையில் மருத்துவமனையில் சிகிச்சை பலனின்றி அவர் உயிரிழந்ததாக மருத்துவமனை நிர்வாகம் அறிவித்துள்ள நிலையில் இவரது மறைவுக்கு பலரும் இரங்கல் தெரிவித்து வருகிறார்கள்.