கர்நாடக மாநிலம் பெலகாவியில் நடைபெற்ற பொதுக் கூட்டத்தின் போது கர்நாடக முதல்வர் சித்தராமையா மற்றும் உதவி காவல் கண்காணிப்பாளர் (ASP) நாராயண் பரமணி இடையே பரபரப்பு ஏற்பட்டது. மேடையில் உரையாற்றும் போது ஏற்பட்ட இடையூறு காரணமாக, முதல்வர் அதிகாரியை மேடைக்கு அழைத்து கண்டிக்கும் அபாயகரமான நிலை உருவானது.

 

பெலகாவியில் இன்று நடைபெற்ற இந்த கூட்டத்திற்குள் பாதுகாப்பு ஏற்பாடுகள் செய்யப்பட்டிருந்தன. மேடைக்கு அருகில் பாஜக பெண் தொழிலாளர்கள் கருப்பு ஆடைகளை அசைத்து ஆர்ப்பாட்டத்தில் ஈடுபட்டனர். இதனால் நிகழ்ச்சி இடைமறிக்கப்பட்டது.

இதனால் கோபமடைந்த முதல்வர் சித்தராமையா, மேடையில் இருந்த உதவி காவல் கண்காணிப்பாளர் நாராயண் பரமணியை அழைத்து, கடும் கோபத்துடன், “நீங்க யாரா இருந்தாலும் இங்கே வா, என்ன பண்ணிட்டு இருந்தீங்க?” என கேட்டார்.

இந்த நேரத்தில் அவர் கையை உயர்த்தி அதிகாரியை அறைய முயற்சிப்பது போலவும் வீடியோ காட்சிகளில் பதிவானது. ஆனால், சிறிது நேரத்தில் தன்னைக் கட்டுப்படுத்திக் கொண்டார்.

அரங்கின் பாதுகாப்புக்காக நியமிக்கப்பட்டிருந்த காவல் படையினரின் கவனக்குறைவால், பாஜகவின் பெண் தொழிலாளர்கள் மேடைக்கு மிக அருகிலேயே சென்று போராட்டம் நடத்தினர். இதை கட்டுப்படுத்த தவறிய காவல்துறையினரின் செயல்பாட்டில் மன்னிக்க முடியாத தவறு ஏற்பட்டதாக முதல்வர் தமது கோபத்தை வெளிப்படுத்தினார். இந்நிலையில், மேடைக்கு அருகில் கைகலப்பும் ஏற்பட்டது.

இந்த சம்பவத்தையடுத்து, ஜே.டி.எஸ் கட்சி எக்ஸ் தளத்தில் கடும் விமர்சனங்களை பதிவு செய்தது. “ஒரு முதல்வர் ஒருபிரதான காவல் அதிகாரியிடம் பொது இடத்தில் கையை உயர்த்துவது மிகவும் தவறு எனவும் இது கண்டனத்திற்குரியது என்றும் பதிவிட்டுள்ளனர். மேலும் இது தொடர்பான வீடியோவும் தற்போது வைரலாகி வருகிறது.