25 வயதுக்குள்…. சச்சின், கோலியுடன் இணைந்த சுப்மன் கில்…! ODI கிரிக்கெட்டில்…. முதல் 35 இன்னிங்ஸ்களில் அதிக ரன்கள்…. அம்லாவின் சாதனை முறியடிப்பு..!!

ஒருநாள் கிரிக்கெட்டில் முதல் 35 இன்னிங்ஸ்களுக்குப் பிறகு ஹஷிம் அம்லாவின் சாதனையை முறியடித்த சுப்மன் கில், ஒரு காலண்டர் ஆண்டில் 5 சதங்களுக்கு மேல் அடித்த 25 வயதிற்குட்பட்ட 5வது கிரிக்கெட் வீரர் ஆனார்..

இந்திய அணியின் ‘பிரின்ஸ்’ என்று அழைக்கப்படும் சுப்மன் கில் ஒருநாள் போட்டிகளில் தனது அதிரடி ஆட்டத்தை தொடர்கிறார். இந்தூரில் ஆஸ்திரேலியாவுக்கு எதிரான 2வது ஒருநாள் போட்டியில் கில் சதம் (97 பந்துகளில் 104; 6 பவுண்டரிகள், 4 சிக்ஸர்கள்) விளாசினார். தனது ஒருநாள் வாழ்க்கையில் தனது ஆறாவது சதத்தையும், இந்த ஆண்டு 5வது ஒருநாள் சதத்தையும், இந்த ஆண்டு ஒட்டுமொத்தமாக (அனைத்து வடிவங்களிலும்) ஏழாவது சதத்தையும் பதிவு செய்தார். இந்த சதத்துடன் கில், பிரபல கிரிக்கெட் வீரர்களான சச்சின் டெண்டுல்கர், விராட் கோலி, ரோஹித் சர்மா, ராகுல் டிராவிட், சவுரவ் கங்குலி மற்றும் ஷிகர் தவான் ஆகியோருடன் இணைந்தார். மேலே உள்ள அனைவரும் ஒரு காலண்டர் ஆண்டில் 5 அல்லது அதற்கு மேற்பட்ட ஒருநாள் சதங்களை அடித்துள்ளனர்.

மேலும் கில் தனது சமீபத்திய சதத்துடன் ஜாம்பவான்களுடன் இணைந்தார். அவர்களில், விராட் கோலி ஒரு வருடத்தில் 4 முறை (2012, 2017, 2018, 2019) 5 அல்லது அதற்கு மேற்பட்ட சதங்களை அடித்துள்ளார். கங்குலி (2000), தவான் (2013), கில் (2023) ஒருமுறை இந்த சாதனையை நிகழ்த்தியுள்ளனர். இந்த சாதனையுடன், கில் மேலும் இரண்டு சாதனைகளை படைத்தார்.

ஒரு காலண்டர் ஆண்டில் 5 சதங்களுக்கு மேல் அடித்த 25 வயதிற்குட்பட்ட 5வது கிரிக்கெட் வீரர் ஆனார். கில்லுக்கு முன் சச்சின் (1996), கிரேம் ஸ்மித் (2005), உபுல் தரங்கா (2006), விராட் கோலி (2012) ஆகியோர் இருந்தனர். அவர்களுடன், இந்த சாதனையை எட்டிய இளம் வீரர் என்ற சாதனையுடன் இணைந்தார் கில். ஒருநாள் போட்டிகளில் அதிவேகமாக (இன்னிங்ஸ் அடிப்படையில்) ஆறு சதங்கள் அடித்தவர் கில் ஆவார். ஒருநாள் போட்டிகளில் 6 சதங்கள் அடிக்க கில் 35 இன்னிங்ஸ் எடுத்த நிலையில், ஷிகர் தவான் 46, ராகுல் 53, கோலி 61 மற்றும் கம்பீர் 68 இன்னிங்ஸ்களில் இந்த சாதனையை எட்டினர்.

கில் தனது ஒருநாள் வாழ்க்கையில் மொத்தம் 35 போட்டிகளில் விளையாடி 66.10 சராசரியுடன் 6 சதங்கள் மற்றும் 9 அரைசதங்கள் உதவியுடன் 1919 ரன்கள் எடுத்தார். இந்த ஒரு வருடத்தில் அவர் இதுவரை விளையாடிய 20 போட்டிகளில் 1225 ரன்கள் எடுத்துள்ளார். அதேபோல முதல் 35 ஒருநாள் இன்னிங்ஸ்களுக்குப் பிறகு அதிக ரன்கள் அடித்த வீரர்களில் சுப்மன் கில் முதலிடத்தில் உள்ளார். 2023-ம் ஆண்டு ஒருநாள் போட்டிகளில் அதிக ரன்கள் எடுத்த வீரர் என்ற பெருமையை சுப்மன் கில் பெற்றுள்ளார் என்பது குறிப்பிடத்தக்கது.

கேரியரின் முதல் 35 ODI இன்னிங்ஸில் அதிக ரன்கள் :

1900+ – சுப்மன் கில்

1844 – ஹாசிம் ஆம்லா

1758 – பாபர் அசாம்

1679 – வான் டெர் டுசென்

1642 – ஃபகார் ஜமான்

இந்தியாவுக்காக வேகமாக 6 ஒருநாள் சதங்கள் அடித்தவர்கள் :

35 இன்னிங்ஸ் – கில்

46 இன்னிங்ஸ் – தவான்

53 இன்னிங்ஸ் – ராகுல்

61 இன்னிங்ஸ் – கோலி

68 இன்னிங்ஸ் – கம்பீர்